Psalms 148
Mel suen la, duruk te, ali imi te, Kaem nup patawomonko ko den
1O aleluya! Kari Biya nup patowaralko!Taiti kuali mel suen la Kari Biya nup patowaralko:
2Nina ko ensel alo duruk wonong te suen biya nunguningkiri, mu nina ko nup patowaralko.
3Nina worem sige baras taiti awete nikim kapawasan, nina ko nup patowaralko.
Baras kaniwasan mu ko nup patowaralko.
4Yu biya kuali*, se mel suen la taiti kuali aniso, mu noko nup patowaralko.
5Mel suen la imi mu nuna Kari Biya ko nup am patawomonko!
Nu balam se nuna arataman.
6Nu balam se tala nunga kuwim kuwim te sokel ago bagasan.
Nu balam se nuna tom suen biya butata bagagilingisan.
7Ali ewere te mel suen la Kari Biya nup patawomonko:
Wal bibiya se mel suen la gagi du te anisan mu se,
8pure nikim se tuwik samamer, se taiti nuwi se, daula bibiya noko kuring karo tusan mu buta noko nup patawomonko.
9Se duruk mutingir se duruk bibiya se,
tam nunguning nasan mu se giarum ningi ko tam,
10se buruk kausik tarak inanganang mel, wonong ko se giarum ningi ko se, makina gawitiru,
mu suen la noko nup patawomonko.
11Se nina king se, ali lilim la ko kariimet,
12se ali sor supuling se, kari bibiya,
se imet itiwik se, kari kulak,
se kariimet garuk se, kuriang gotektek,
13mu nina suen la Kari Biya ko nup patowaralko!
Nu kota suwanta nup biya.
Noko nikim, ko sokel, ko nup biya, mu ali se taiti kia saparam.
14Noko kariimet Isrel mu noko gomang motam.
Se nu sokel nungaram se ko nup patowasan.
Se Kari Biya ko nup patowanakko! Aleluya!
Copyright information for
WSK